郭晉安黎耀祥台慶劇正面交鋒爭視帝

十一月十九日是無綫台慶，為慶祝一年一度大日子，無綫嚴選了兩套台慶劇作賀壽，分別為時裝喜劇《老表，你好hea！》及家族、商場鬥爭題材的《商戰》。兩劇演員來頭不少，當中《老》的郭晉安更憑早年《戇夫成龍》和《阿旺新傳》兩度贏得視帝，不過，《商》的黎耀祥亦不遑多讓，他更憑《巾幗梟雄》系列及《大太監》劇集三度稱帝，可謂兩雄相遇，必有睇頭。

對於成為台慶劇，安仔受訪當然感到高興，至於憑《老》劇將被列入台慶頒獎禮角逐視帝，與及他早前播出叫好叫座的《忠奸人》亦屬入圍之作，兩劇在手安仔坦言興奮，並對攞獎有信心：「對上嘅視帝至今已相隔近十年，的確燃起心中一團火，我對拍劇仲好有熱誠，但獎項嘅嘢，始終公司有個選舉制度，所以唔敢揣測。」

至於祥仔目前仍身在上海拍攝無綫劇《梟雄》，他受訪時被問可有信心憑《商戰》四度奪視帝？他說：「自己信心一般，仲有其他對手，好似《老表》嘅王祖藍、《忠奸人》嘅郭晉安。」

蕭正楠撐曹永廉攞獎

劇接劇的祥仔坦言拍《商戰》時頭段相當辛苦，因支線多，除了祥仔本人外，還有黃浩然、蕭正楠、曹永廉、陳國邦等，而女角方面則有胡定欣及新加入的陳凱琳、蔡思貝。據悉，五人明年初會再合作開民初版。眾主角得知成為台慶劇後當然開心，蕭正楠說：「今年仲未有劇播，相當好，一班兄弟合作無間，好期待，拍攝時好辛苦，要瘦幾十磅練肌肉，又要同泰國拳手打拳，都受咗好多傷，希望套劇收視、口碑都好。」

之前已角逐過台慶男配角的蕭正楠被問有否信心奪獎？他抵死的笑說：「上年係提名過，但今年有曹永廉喺度，佢唔攞呢，唔知幾時先有得攞，所以我今年全力支持佢，叫佢上台攞獎時記得多謝我呢個契哥呀！」

而曹永廉接受訪問時被問到之前在《寒山潛龍》的演出已受不少人讚賞，更指阿廉今年極大機會奪「男配角」，他開心地說：「依家都係啱啱開始，唔敢諗咁多，（蕭正楠叫你多謝佢呢個契哥！）其實就唔係好關佢事，不過如果到時記得咪搭句囉！」