沈震軒拍單車戲　盡力克服陰影

藝人沈震軒（Sammy）今日喺機場出發到台灣拍攝無綫新劇《衝線》。會到當地拍攝大型單車比賽嘅佢就表示緊張，因為之前拍《使徒行者》單車戲時跌斷手：「自己小心啲。（有陰影？）克服到嘅！依家真係小心好多。」更坦言右手「都有feel」，所以都有危機感。佢又指雖然早前練過約一星期單車，但拍攝進度緊密，所以抽唔到太多時間再受訓：「反而去到會多咗時間去休息，因為番到酒店冇其他嘢做，平時番到屋企又搞呢樣又搞嗰樣。」

講到黃秋生北上上海拍攝無綫新劇《梟雄》不滿要補貼五星級酒店嗌罷拍，Sammy就謂：「我覺得秋生哥我哋係要款待嘅，因為真係好高薪請佢番嚟，應該要有呢個待遇嘅。」又自言自己係「新仔」，雖然未知到埗會住邊，但無所謂：「我都好緊張，我哋喺啲咩客棧住，古裝咁。」而位處接近市中心，附近又有便利店，所以無太大問題。至於會否怕食到地溝油？佢直言唔怕：「要出街食嘢都慣咗。」