「姣溝」謙仔? 蔡思貝懶理:拋開一邊開心工作

20140918
東網電視
更多新聞短片
蔡思貝表示唔怕再同謙仔傳緋聞。

藝人蔡思貝(Sisley)今日喺機場出發到台灣拍攝無綫新劇《衝線》。佢笑言出埠拍劇有當年13歲出國讀書嘅感覺:「但係我有少少病,好驚會封喉。因為前一日放咗日假,(啲病)就出嚟。(冇睇醫生?)尋日冇時間睇,但有帶感冒藥。」有報道指佢「姣溝」同劇嘅羅仲謙,問齊齊赴台同度三週會否怕再傳緋聞,佢謂:「唔怕,都寫過啦!第二次應該冇新鮮嘢寫掛,去到就將新聞拋開一邊,繼續開心工作、開心拍攝。(冇唔開心?)少少都有嘅。」又指大家都有主動安慰佢,包括羅仲謙:「佢就懶係用大師兄嘅口吻,即係懶係有經驗咁同我講,我就話得喇,多謝你教導,我唔會唔開心,咁就冇事。」

講到黃秋生北上上海拍攝無綫新劇《梟雄》不滿要補貼五星級酒店嗌罷拍。Sisley就指自己以前習慣流浪所以唔介意酒店安排:「火車站我都瞓過,有得瞓就得。同埋一班人住邊都冇所謂,都係嘻嘻哈哈。」又指到台灣會踩室內賽場面,甚具挑戰性,而參選港姐時又曾喺台灣踩單車,恍如重臨舊地。