鍾嘉欣直認恨攞視后：暫時唔公開戀情

藝人鍾嘉欣到電台宣傳新劇《大藥坊》，嘉欣直言近期收視開始上升，希望繼續有好消息，講到早前《好報》影到嘉欣與男友伍允龍出席活動，嘉欣因男友手多多而「河東獅睥」對方，嘉欣表示：「咁啱影到個表情，嗰晚係朋友生日，朋友先係主角，當晚應該只有開心嘅成分而冇怒睥成分。」

講到當晚同場的王君馨與陳法拉舊愛薛世恒全晚密密傾，嘉欣解釋大家都會密密傾：「嗰晚好開心大家都係基督徒，密密傾好正常，依行太多壓力，大家可以互相扶持係好好，同埋好想講一個正確嘅訊息，其實男女都係可以做朋友，係真係會有兄弟姊妹。（所以唔公開戀情？）暫時都唔會公開戀情住。」

等十年唔覺長

談到今年有機會爭奪視后，嘉欣會否怕感情生活影響獎項？嘉欣直言沒太大所謂：「獎項係有自己嘅時候，有啲人啱時間攞，有啲人又未必有獎運。（等咗十年？）十年對我嚟講好短。（覺得自己獎運到？）依個要睇番年份，今年可能興喜劇，下年可能興悲劇，希望今年會興杜佳期（嘉欣劇中角色）。」

嘉欣又表示10月新劇《飛虎2》出街，希望大家可以在短短幾個月中見到兩個不同的嘉欣。至於今年視后勁敵佘詩曼，嘉欣表示一直好欣賞對方：「初入行時傳媒問我Look up邊個？我話係阿佘。」