上海車禍　關禮傑捱撞噴血秋生讚堅

影帝黃秋生、關禮傑、陳煒與湯鎮業近日在上海為無綫新劇《梟雄》拍攝外景，在拍攝一場講述關禮傑遭車撞至飛彈吐血倒地的鏡頭時，關禮傑親身上陣吊威也演出，獲秋生大讚身手不凡：「關禮傑真係堅！佢自己上陣吊威也，話晒都幾十歲人，飛咗成十幾個Take都面不改容，身手真係好，等我返去都練吓先！」

拍攝順利10月底返港

一度罷拍的秋生指拍攝進度順利，還大讚無綫安排有改善。問可存在溝通問題？他說：「小問題一定有，心平氣和去解決囉，好似之前有個景搵廿分鐘都搵唔到，打電話問又冇人聽，第日我反映番，之後收咗七張地圖，多到要派畀人！我冇嘢喎，又唔係搞事，之前要求嘅基本條件都解決咗，望拍攝順利，如期10月底走。」

監製壓力大個樣似話梅

無綫高層曾勵珍北上探班，問秋生是否專程來安撫他？秋生說：「係有高層上嚟，但我趕緊戲，都唔得閒理。出外景人手唔夠，問題梗有，嘈咗冇用，自己搞清楚啲囉，扯火都冇用。我反而見監製（王心慰）好大壓力，個樣好似話梅咁，我都冇計，幫佢唔到，希望佢放鬆啲啦！」

陳煒嫁湯鎮業充滿懷舊風

此外，陳煒與湯鎮業拍攝結婚戲時曾勵珍及馬海倫探班，陳煒穿上復古婚紗，與戴假髮上陣的阿湯在上海街頭乘坐古董車進行拍攝，甚有懷舊風。