王祖藍惡搞全智賢　李亞男嗌頂唔順！

向來鍾意搞笑同扮女人嘅王祖藍，呢日又有新搞作。佢早前應廣告商邀請，惡搞全智賢嘅護膚品廣告片，廣告入面嘅祖藍着住白背心，學全智賢講韓文之餘，仲要懶靚咁喺度sell product，同全智賢有八成相似之餘，效果仲極度爆笑。

雖然齋睇條廣告片，完全唔明祖藍講乜，但佢接受《東網》訪問時，就話其實個廣告入面，有一半係真韓文：「其實係我自己逐句韓文聽番，然後拼番英文拼音去講，拼唔到就亂作，所以啲韓文有一半以上係真嘅。」祖藍更指女友李亞男亦覺得惡搞片十分搞笑：「阿男覺得好好笑，但就頂唔順咯，因為本身呢個係佢女神　佢話無辦法想像自己男朋友喺度扮緊佢心入面嘅女神。」

雖然條片只係曝咗光幾日，但網上反應奇佳，祖藍仲話就連喺美國，都有成二萬個粉絲轉發條片，真係相當厲害。