世紀同場上集　嘉欣BB同伍允龍合照嚇到硬軚

伍允龍在圓方出席主演電影《天師鬥殭屍》首映，緋聞女友鍾嘉欣及好友安志杰等均有撐場。「女友」難得同場，記者朋友自然不會放過這個世紀合照機會。雖然伍允龍及鍾嘉欣經常以「好友」稱呼對方，但現場所見，二人合照時異常尷尬，經常一個望左、一個望右，而嘉欣BB站在伍允龍身旁全程顯得僵硬，反之與殭屍合照時則活潑晒V，形成強烈的對比。不過再睇真啲，便會發現嘉欣BB合照期間，一度係咁同伍允龍密密斟，證明兩個人感情真係好好。

席間，伍允龍與嘉欣的緋聞更慘被擺上枱，當王晶（晶哥）送上「哪吒動作必殺符」給他時，大會司儀笑謂：「可以鎮住鍾嘉欣嘅符？」晶哥即打趣道：「鍾嘉欣梗係必殺啦！」在旁的伍允龍聞言只好尷尬傻笑。

透露片中會戴爆炸頭扮演搞笑角色，他說：「平時拍硬漢角色，今次向鄭中基、晶哥學嘢，而且要挑戰做動作導演，我哋要捉到殭屍嘅Tone。（有睇以前殭屍片？）當然有啦，當年上畫都有睇，爸爸不但教我功夫，好多睇戲興趣都係佢畀我。（演搞笑有難度？）平時我都好鍾意搞笑，所以都冇難度，加上戴咗個爆炸頭，已經好搞笑。」

指導元彪動作戲呻緊張

提到指導前輩元彪動作戲份，他坦言會緊張：「Dream comes true，好耐之前已認識呢位前輩，以前佢有介紹我拍戲，同佢合作當然有壓力，但我知佢做到嘅，因為佢係好好打嘅演員。」對於太陽娛樂投資電影《屍城》同期上映，今次兩片自己打自己，伍允龍說：「一個人可以睇好多戲，希望兩套戲都有好效果。」並直言有邀請緋聞女友鍾嘉欣及安志杰等好朋友來首映撐場。