世紀同場下集　嘉欣BB為伍允龍打爛六年齋砵

鍾嘉欣高調現身電影《天師鬥殭屍》首映，以行動力撐緋聞男友伍允龍，兩人大方地應傳媒要求合照時，在場數十傳媒不斷叫囂，場面熱鬧。

問到是否撐男友伍允龍？嘉欣說：「因為有朋友請我睇戲，所以今日就嚟啦。（邊個請你嚟？）阿龍請我嚟嘅，因為啱啱拍完劇多咗時間，加上覺得呢行好靠關係，不嬲都係你撐吓我、我撐吓你。（首次咁公開撐場？）我初初入行成日睇首映，之後忙吓忙吓冇再睇，今次係六年後首次再睇首映。」

否認公開戀情

問兩人台上合照有否尷尬？她說：「點會呀，唔會唔會，睇戲啫。」再問是否感情浮面時？嘉欣卻否認謂：「唔關事，只係好簡單地今日得閒，又有朋友請我睇戲，咁咪嚟睇囉。（今日公開戀情？）睇戲啫，有另一個朋友一齊嚟睇，香港好耐冇再拍殭屍片，以前細個睇好多、好好睇。」

想合作拍戲

記者笑問兩人會否一齊坐？嘉欣BB即迴避說：「睇佢哋畀咩位我，唔知佢哋畀咩位我。（驚嗰時挨落佢度？）我通常驚起上嚟會瞇埋眼、縮埋一嚿，好少挨。（縮落佢度？）唔會唔會，我一陣應該同女性朋友坐，支持朋友套戲，支持殭屍片。」她又稱想做西式吸血殭屍，問會否考慮跟伍允龍合拍電影？嘉欣表示睇緣份：「想唔代表會有，不嬲拍戲睇時機。（有人搵會做？）通常有人搵都要經公司，如果公司ok咁咪做囉，個角色啱我、有挑戰都會考慮，但依家冇人搵我，所以都催谷下叫多啲人搵我拍殭屍片啦。」