陳鈺芸自爆食肥咗

性感武打女星陳鈺芸（JuJu）日前到新西蘭拍攝荷里活動作電影，打得又寫得的JuJu自爆其新書將三度加印：「我本《點菜英文》年頭印第二版反應熱烈，近排仲收到出版商通知我再推出第三版！台北市六十多間書店都熱買緊，仲成為咗暢銷書籍！」她稱借寫書之名而「狂擦」美食：「書商都叫我再寫新飲食書，所以難得依家可以借資料搜集為藉口，喺新西蘭大食特食！」

空閒時愛品酒嘗鮮的JuJu自爆「暴脹」：「我一有空閒時間就同演員、工作人員去酒莊品酒！呢度仲有夜市，新西蘭啲紅酒、芝士、肉類同海鮮質量好又新鮮！除咗食西餐，我連中餐都唔放過！我喺當地搵到拍得住香港又超好食嘅燒味店，我仲一個人食哂兩碟雙併燒味飯！雖然我都有繼續練功夫同做運動，但呢度咁好食同好住，我真係肥咗八磅！」