周慧敏出福音碟迎聖誕：搞到個腦熄唔到機

藝人周慧敏出席活動，她透露入行已經28年。問可有計劃舉行30年紀念演唱會？她坦言有想過，但目前先要處理錄製自己首張福音唱片事宜：「我要閉關錄歌，因為隻唱片想喺聖誕前推出，依家完成咗5隻歌。而且又要拍MV、又要影唱片封套，時間好緊迫。今次係自己製作，好多嘢都控制到，但係我個腦熄唔到機，作息亂晒。錄完歌之後成個腦都係啲旋律，搞到我失眠。」

王菀之幫手作曲

她坦言信仰是她創作這張唱碟的動力：「信咗主之後，好多基督徒甚至非信徒都問我幾時會出福音碟，呢個係對於信仰嘅一份功課，遲早都要交，今年快啲做咗佢。（將唱片收入捐出去？）我都想，不過首先做好隻唱片先。今次自己係創作總監，有自己寫嘅歌，又要監住啲詞。王菀之亦會寫歌畀我，初步構思係我哋合唱，如果做到就最好。（老公有冇幫手寫詞？）佢有畀意見，不過唔會過問太多。如果我有嘢問，佢都好歡迎我提出。佢係我信仰上一齊探索嘅伴侶，我哋好同步，佢畀到好多中肯嘅意見我。」唱碟中有很多不同題材，當中包括兩性關係、社會、黑暗、死亡和罪等，而她創作的歌曲着重恩典。