溫碧霞「胸」贏JW

女星溫碧霞（Irene）的icon冇人不知：露肩加低胸，入行多年不論四季冷暖，依然貫徹如一，就算少有地同老公何祖光一起出席電影《戰逆豪情》首映禮，都一樣毫冇保留、一副戰鬥格以花花低胸裙一次過滿足晒低胸露肩嘅願望之餘，完全輕易fight低同場兼同樣晒「胸器」嘅歌手JW！

初同老公到場時，Irene都有披住件外套，但一到影相環節，加上老公已入咗戲院安坐，就即刻揮一揮手，輕輕除低件外套使出「胸器」，仲加多招半遮半掩，秀髮不時遮吓事業線，吸睛度即刻大增。相反JW全程外套跟身，雖然低胸但連事業線線頭都唔見，真係爭啲囉！

Irene透露將拍攝其工作室的首部電影《愛在深秋》，自己會擔任出品人及演員角色，她表示故事發生在秋天，是一個很浪漫的愛情故事，會在內地如桂林及深圳等地取景。

心情大靚的Irene笑言家庭美滿及工作順利，令她相當開心：「好多工作願望都實現，多謝英皇咁支持我呢部戲，可以參與做幕後，生活充實，家庭又幸福，小朋友（養子）氹得我好開心。」提到同行的老公何祖光低調入場，Irene笑言對方怕醜：「佢不嬲怕醜。（佢會撐你工作室第一部戲？）佢一定會！（到時一齊行紅地氈？）順其自然啦！我覺得咁樣幾好，我鍾意男仔怕醜啲。」

提到林峯將加盟英皇，Irene表示兩人曾合作《詭嬰》，認為同公司有更多演員是好事，問到會否請林峯參演其新片？她表示要看故事是否適合：「今次有兩個男角，一個係好型好cool，我揀咗阿譚（譚耀文），另一個就係內地新演員，因為故事喺內地發生。（遲啲再同阿峯合作？）希望啦！」另外，女星貝安琪及男星馬志威等也有出席電影首映。