古天樂吳君如搵林峯做「鴨王」

現年34歲的林峯自今年8月約滿無綫後不再續約，為了在影圈食大茶飯將賣身英皇在歌影視三棲大展拳。最新一期《好報》拍得他日前相約近年積極投資電影的古天樂及吳君如搞的秘密飯局，據知古仔睇中林峯潛力無窮，有意與好友吳君如籌備拍電影《金鴨》，邀請林峯做男一，打造他成為新一代「鴨王」。

日前古仔和君如相約林峯到灣仔開餐，商討合作大計，同行還有曾志偉、君如偕父親夏春秋與囡囡陳是知。據悉，待眾人開餐後，古仔和君如拉林峯一邊密密斟，望以誠意打動林峯做「鴨」。據知情人士透露：「古仔搵『鴨王』搵咗好耐都冇適合人選，今次就吼林峯喺影壇有新鮮感，阿峯喺《使徒行者》演技又有進步，又夠Hit，所以都好想搵佢合作。」

傾到晚上11時許，古仔和林峯率先步出飯店，原本二人還雞啄唔斷，但見記者在場，為免洩露機密，即時保持距離。林峯雖然心情大靚，全程笑容滿面，但仍一支箭拔足登上七人車，沒有接受訪問。期間，君如拖住囡囡陳是知發現座駕仍未駛到，揚聲大嗌：「我架車冇理由唔喺度！」其後瑟縮在一旁慢慢等車，志偉則疲態畢露，登上車時已經九秒九瞓着。