冤家路窄！風騷佘詩曼VS閃縮周麗淇

不時傳出翻撻的佘詩曼及鄭嘉穎，早前不避嫌現身好友曹永廉生日會，並孖住滿場飛兼不停密斟，明顯愛火隨時一觸即發！對於「翻撻」阿佘，嘉穎未有完全否定，只拋下一句：「感情事要講Timing。」未知是否因嘉穎的「Timing論」，阿佘前晚現身公開活動時，雖然面對嘉穎兩任「舊愛」周麗淇及模特兒徐靖雯夾擊，但阿佘表現依然風騷，問到跟Niki及Jenny同場會否尷尬時？她更笑謂：「今日出嚟工作，大家都好開心。（介唔介意同Niki合照？）大家安排。」對於嘉穎的「Timing」論，阿佘則意有所指謂：「我一直都係單身！（唔介意食回頭草？）愛情好微妙，如果兩個人開心，時機成熟喺埋一齊係開心事，唔應該用唔好嘅形容詞去形容。（你鍾意畀機會人？）如果有好嘅人出現，會同大家分享！」言談之間，亦不排除與嘉穎復合的可能性。

這邊廂，阿佘風騷講復合，那邊廂的Niki則玩「閃避」。事緣阿佘受訪時，Niki原本就在不遠處，不過當其助手向她耳語一番後，Niki即連相都未影完便突然玩消失，直到阿佘做完訪問離開後才再度現身，「失蹤」時間相當巧合及敏感。可惜地球始終係圓嘅，當Niki受訪時，阿佘竟又巧合地從Niki背面擦身而過，未知是否被觸動神經，Niki笑容即時頓時變得僵硬，不過她仍死撐不介意與阿佘合照及同場：「我唔知阿佘喺現場，唔知大家點解咁鼓譟！剛才影影吓相助手話我知件衫個扣針爆開咗怕走光，所以入返去整，希望大家高抬貴手。（避開阿佘？）我冇避開！唔會咁唔大方，同場冇所謂，構成大家嘅幻想唔好意思！」不過當問到佘穎翻撻有望，Niki即「起晒弶」說：「唔好問我呢啲，放過我！唔關我事，我冇乜嘢可以講。（祝福佢哋？）我唔知！怕答錯好危險，人哋嘅嘢我唔知。」

徐靖雯大方祝福佘穎

至於嘉穎另一舊愛徐靖雯，則一臉無奈表示與Niki及阿佘同場不尷尬：「都係好耐之前嘅事，成三、四年前。唔覺係大會刻意，我最近忙工作，將接拍賀歲片。（傳佘穎復合？）係舊聞！冇新鮮感，生活變化得好快。（祝福佢哋？）邊個同邊個一齊都會祝福。」