林峯豪搞生日宴　千語BB升級做公主

千語BB生日快樂！摯愛嘅吳千語21歲生日，林峯呢個愛B如命嘅男友，當然不敢怠慢，剛由內地出席剪綵活動吸金後，就立刻返港為女友慶祝！點慶祝？就係同千語BB一齊喺火車擦大餐！林峯特意包咗香港文華東方酒店最潮一間餐廳庫克廳（The Krug Room），搞咗個別開生面嘅派對。庫克廳巴閉之處，原來係由著名法國庫克香檳酒廠同酒店打造嘅全球最私密嘅餐廳，餐廳設計尤如火車車廂，客人可以透過車窗睇到大廚烹調美食，而餐廳只係招待12個人，餐單由法國大廚度身訂造。

既然可以招呼12個人，又要逗千語BB開心，所以邀請埋千語BB一班好友一齊慶祝，一嚐度身訂造嘅多道美食。餐桌上面，放咗千語BB最喜歡嘅珠寶鑽石同高踭鞋等等，嘩！唔係咁豪任攞咁土豪嘛？其實呢啲係大廚親自打造，既可以裝飾又可以食落肚嘅甜品。林峯咁有心思，難怪千語BB全晚甜絲絲，大合照時捉住林峯隻手，仲笑到鬼咁甜！千語BB玩得興起，仲化身導演幫男友拍片，千語BB一聲令下:「Action！」林峯即好乖豬咁打開內有美食嘅盒，仲要七情上面咁擺晒驚訝嘅表情，男友交足戲，相信千語BB非常受落！

生日蛋糕見得多，但係千語BB呢個生日蛋糕，真係一啲都唔惹少！呢個高度超過一米嘅蛋糕以「公主的城堡」為主題，城堡下面有個真係識噴水嘅活動噴水池外，仲有一個設計cute爆嘅公主企喺城堡上面。最奇怪係，只係得「千語公主」一個企喺度，「Chok峯王子」反而冇影，但睇真啲，城堡下面有兩個分別放咗豬仔同狗仔嘅迷你城堡，唔知係咪寓意林峯承諾千語BB，以後好似狗狗咁忠心同埋會乖乖豬呢？

據知呢間餐廳嘅到會服務最少都要12萬港元，依家喺餐廳度搞，睇嚟呢餐飯都係價值不菲，真係豪搞架！一眾網友睇到眼都凸埋！仲話千語BB好幸福，可以搵到林峯呢個咁好嘅男朋友！