陳敏之做「曲奇天后」　望成為香港手信

「索腿天后」陳敏之新婚後再榮升老闆娘，自己打本於天后開曲奇餅店，下午舉行開幕禮時獲眾圈中好友撐場，包括陳志雲、伍詠薇、郭晉安夫婦、林子善、周家蔚等，吸引逾半百途人、粉絲圍觀及拍照，加上現場數十傳媒到場採訪，令整條街逼滿人阻塞道路，就連擔任司儀的森美，也慘遭逼到一角，站在街坊堆中主持儀式，場面搞笑。

敏之透露與幾位股東合資七位數，由試味到開舖籌備了一年，老公則做其「幕後軍師」畀意見，她說：「因為我鍾意食曲奇餅，主要想發放正能量畀全世界，因為我哋個名叫『BLESSCUIT』有祝福意思，買餅會送祝福卡希望收到餅嘅朋友會感受到我哋嘅愛。（唔使搞真BB？）冇時間搞，未住，因為呢個係我第一次做老闆娘，擺咗好多心血落去，我想focus喺呢度、畀多啲心機。（老公冇埋怨？）冇，佢都好鍾意呢個曲奇，試過都話好好味。（親手學整？）有，因為學識先知廚師擺咩料，整餅都好玩。」

她又表示其「鎮店至寶」全港獨有的黑松露曲奇，是自己想出來的：「因為平時食飯都好鍾意加黑松露，所以叫大廚試吓加呢個元素，依家係最好買，雖然成本好貴，但唔敢賣咁貴，希望大眾化啲。」對於開張阻塞道路，敏之稱有跟街坊講「唔好意思」，又獲鄰近店舖幫襯支持，並透露計劃明年初在九龍區開分店，她說：「我都有信心做得好，因為未開張已接到好多訂單，朋友好瘋狂一百、一百咁訂，希望將來成為香港手信。（撼曾志偉代言餅家？）唔係，志偉哥地位冇人能撼到，佢哋賣啲餅唔同，百花齊放就最好，我可以代表曲奇界做『曲奇皇后』。」