好武功！千語BB施展半天吊絕技　可惜撞瘀腳

藝人吳千語在新片《青春鬥》中雖然有大量動作場面，但佢一啲都唔怕，仲大叫好玩！吳千語表示：「其實我唔算打得多，盛君同徐正曦打得最多，因為喺戲入面我打排球就叻，但打功夫就唔識！」

吳千語又指在戲中人人都武功高強，在其中一場戲中追着她圍打的三位演員，更是真正的少林俗家弟子！為免不幸受傷，千語BB正式拍攝前不停向武術指導梁小熊請教，千語更大賣口乖咁謂：「導演好好人，一早預備咗替身畀我哋。拍之前亦有安排武術導師教我哋一啲啲功夫，可惜我抽唔到時間返大陸學，惟有執生啦！」

談到拍攝一場要跳上籃球架的戲份，千語自爆「搞到腳仔都瘀埋」！她透露雖然當時吊着威也，但因仍要用力箍實個籃球框，所以就唔小心撞瘀咗對腳！