張智霖想請蔣志光復出

張智霖出席活動，他提到最近播出的劇集《老表，你好hea！》中蔣志光的改版《相逢何必曾相識》十分精彩。他表示：「出道嗰陣大家係同唱片公司，《相逢何必曾相識》當年同《現代愛情故事》打對台，咁啱一、兩月前韋綺姍提出reunion，有黃寶欣、蔣志光，一齊打邊爐，但就冇唱歌，原本許秋怡都嚟，但佢屋企天花冧咗，冇嚟到，但會再搞過。（再合唱？）有就無任歡迎，我哋都一齊唱過《舊朋友》，想申請唱番。」他又爆7月的演唱會原本想請眾人做表演嘉賓：「好難集齊人同好難開口，希望今次開咗口，下次個唱可以一齊唱。（係咪想蔣志光復出唱歌？）絕對要。（推薦佢畀公司？）等我穿針引線。」