畫足兩個月！林峯親手仿製名畫送BB

林峯出席活動時，被問到早前與女友吳千語（BB）同遊的歐洲之旅，他說：「去咗睇Gallery啲Art pieces，都買咗啲，BB陪我過去揀，買咗六位數字。（當投資？）首先自己鍾意，難得依家有時間去留意，又係個好好嘅投資。自己呢一、兩年就買多啲當代藝術嘅，啱啱今次就買啲四、五十年代嘅，好靚，我哋兩個都鍾意。（今次係BB嘅生日之旅？）都可以咁講，主要係去睇Art pieces。」

送畫畀BB

他透露有畫畫送給BB。他說：「報道話我整堡壘蛋糕，唔係我整，係有畀意見去設計，唔係十萬咁貴，都係食餐飯。我畫嗰幅油畫係模仿一幅名畫，斷斷續續畫咗兩個月，BB都好驚喜，但又未感動到喊。我要挑戰佢，佢成日準備到好勁，佢今次真係估我唔到，我醒咗。」

簽約英皇下周公布詳情

他又承認簽約英皇，下周將會公布，至於身價是否一億？他說：「呢個係商業秘密，絕對係滿意價錢，會全方位發展。」另外，提到有傳胡杏兒離開無綫，林峯表示不知情，相信杏兒有自己想法。而有傳無綫想以陳展鵬代替他，林峯坦言各有各優點，不會說誰代替誰，又讚陳展鵬是好演員。