獲王菀之力撐攞獎　張敬軒飛吻回禮：抵錫！

張敬軒與王菀之（Ivana）出席頒獎禮記者會，兩人一起合唱《青春常駐》冧粉絲。為了追求完美，軒仔除了出動私家咪之外，還帶同家中的長木櫈到場，夠晒認真！

對於有指好大機會奪得女歌手金獎，Ivana謙虛地說：「每到年尾都有呢啲揣測。（今年總播放率好高？）咁啱今年做咗演唱會，電台播多咗支持。（有冇信心拎獎？）做任何事都有信心。」問到是否對女歌手金獎「坐定笠六」？Ivana即搞Gag說：「去街市買柑？冇信心呀。」

同王菀之互笠高帽

身旁的軒仔坦言對Ivana極有信心，記者即笑他對另一好友容祖兒沒信心？軒仔即笑言：「都睇好祖兒，補番飛先！好多國際頒獎禮都出現雙冠軍。」問到軒仔有否信心奪男歌手獎？他坦言看好周柏豪，並大讚對方勤力，軒仔說：「今年歌手獎就唔會有，可能五強不入，反而對歌曲獎有信心！今年放咗好多時間喺舞台劇同演唱會。」

隨後，軒仔又透露看好師弟羅力威，對於對方日前在活動上因坐位問題而發脾氣，抵死的軒仔說：「大家可能唔知佢每個月都有唔方便嘅日子。」身旁的Ivana即插嘴說：「我覺得男歌手獎係你攞！」軒仔忍不住扮咀她說：「真係抵錫！」