徐子珊自爆全家搬晒去台灣

無綫藝員徐子珊出席無綫劇集《以和為貴》的慶功飯局，作為請客的其中一員，子珊就話自己帶夠錢，她笑謂：「幾千蚊夠喇啩？不過我都帶定多少少！」

訪問時，子珊大呻劇集拍完感到依依不捨，她笑謂：「今次係我拍得最開心嘅一次，無錯一開始係攰少少，不過特別要多謝亮哥（黃光亮），成日都令到我哋好開心。（因為是非少？）我哋相處好融洽呀，大家成日諗計令到對方發揮得好啲，又會傾下個情節點先會討好。」

子珊又透露嚟緊十二月會參與演出電影，不過就神神秘秘唔講得，不過中間呢段時間都無得抖，因為要準備無綫台慶同埋去新加坡登台搵真銀。

提到放假，子珊就話聖誕節可能會去台灣探屋企人，仲自爆原來佢全家都搬晒過去，係間唔中佢哋會返下嚟香港，問她過節會寂寞？子珊笑謂：「咁台灣好近啫，就算週末我都可以過去台灣啦！」不過子珊對於日前有星二代在台灣夜店被迷姦一事未有聽聞，更謂自己少去夜店，而她在台灣的姨甥仔女都仲細個，所以唔太擔心咁話。