張繼聰甘願當軟飯王　自嘲做廢柴

藝人張繼聰在無綫劇《老表，你好hea！》中用胸肌大放笑彈，徹頭徹尾成為一個大隻軟飯王。問劇中軟飯王概念是否自己構思？他坦言是監製和王祖藍的搞作：「早幾年成日畀人笑，我自己就放開咗。既然咁多讀者一廂情願相信，但滿足唔到佢哋個想像，呢次就畀個機會佢地。（你話謝安琪個老公係廢柴！）呢個我自己加，玩自己冇所謂，我仲勁講添！」他為操爆肌不惜以九個月時間每日練足三個鐘：「呢個肌肉係我嘅Costume！其實呢件事好變態，好辛苦咁練但係拎嚟笑！」他又指與韓馬利的「感情線」是戲肉：「簡直係軟飯王之路！」

劇中與王菀之有感情瓜葛的張繼聰，雖然與對方在娛樂圈鬥得你死我活，但大爆最終會與王菀之有咀嘴戲，問是否咀得激情？他謂：「唔激，最激肯定都係阿Bob同小寶嘅咀戲。（同老婆交代？）都冇交代，佢都有做戲，佢都明演員係做乜。不過我都試過瞓地下，呢啲嘢有借有還。」《老》劇開播後收視一直不俗，他就指拍攝時已經好感動：「我哋好齊心，當然最辛苦係祖藍，咁辛苦都係想將歡笑帶畀觀眾，雖然咁講好老套，但係係真嘅。」