加拿大為仔仔慶生　苗僑偉感慨時間過太快

藝人苗僑偉（三哥）經常留喺香港拍劇，一對仔女就長居加拿大，而日前三哥就孖住老婆戚美珍齊齊返去加拿大為細仔苗俊慶祝廿一歲生日，見到仔女轉眼間長大，三哥喺微博都一時感觸留言：「一家四口為慶祝弟弟生日又重聚，小魔怪長大成人了有時想想...感覺他們長得太快了點，為什（甚）麼時間總是過得那麼快啊！真要好好珍惜跟孩子共處的時間。 」佢又上載生日會嘅照片到微博，清楚見到現場除咗三哥一家，仲有唔少外籍青年，相信係仔仔嘅朋友，氣氛相當熱鬧。