黎耀祥視郭晉安為最強視帝對手

藝人黎耀祥出席安全駕駛活動，他表示喜歡自己駕車而不用聘請司機：「因為我工作時間唔定，怕煩到人。」他又指當自己疲倦時會叫太太當司機。問到拍完劇回家時會否開快車？他說：「比較少，都知圈中好多意外都係超速發生。（有冇試過差啲有意外？）好彩冇，我比較穩陣派。」

撐祖藍求婚無刻意谷收視

講到前晚無綫台慶的收視，他表示收視一向差不多都是這個水平：「冇得同以往比，依家嘅習慣唔同咗，有好多方法可以睇番節目，唔使定時定候坐喺到睇，而我都係比較鍾意坐定定咁睇電視。」至於有指無綫以王祖藍求婚谷收視？他笑言祖藍不會拿終身大事來玩：「攞嚟做紀念啫！講真收視關我哋乜事。」

最強對手係郭晉安

問到會否怕年尾的頒獎禮收視低？他坦言：「頒獎禮冇表演，都係靠頒獎嘉賓搞氣氛，全世界都一樣。（咁你有冇信心？）一半一半啦！《名門暗戰》係我繼《義海豪情》後最鍾意嘅劇。」他亦視郭晉安為競爭對手，認為對方在《忠奸人》角色夠特別，是對方一向少接觸的角色，又指演特別的角色往往有優勢。