疑開節目續集　阮小儀孖金剛密密傾

過往曾經合作主持飲食節目嘅藝人阮小儀（小儀）同金剛，除咗喺螢幕前非常合拍，私底下亦相當老友，不時講飲講食，小儀近日喺微博上載一張同金剛合照，又留言：「我哋有啲嘢傾緊！」相中小儀嘟嘴扮可愛，金剛就皺眉瞪眼兼「嘴眇眇」，真係完全估唔到佢哋傾咩傾到咁嘅樣，有網友就估佢哋傾緊拍飲食節目續集，亦有網友搞笑留言話佢哋傾婚事同傾禮金，睇嚟答案真係要等當事人開估先得。