無綫新制　林峯冇得爭視帝

林峯自七月底離開效力十五年的「娘家」無綫後，終在本月24日落實，以一億天價賣身到英皇三年做「親生仔」，實行歌影視三棲好好發展，並以電影作主打。

雖然林峯離開「娘家」無綫，不過在下月十五日舉行的《萬千星輝頒獎典禮2014》，獲無綫「開綠燈」，憑劇集《使徒行者》中憑「爆Seed哥」一角，演技備受讚賞，故無綫今次亦大方讓他角逐今屆視帝！

新柯打減離巢藝人曝光率

《東網》收到可靠消息，無綫高層近日在內部會議向製作部落「柯打」，如力捧藝人一旦約滿無綫加盟其他公司，無綫都會在未來一至二年盡量減少其曝光率，意思是未來即使有重頭劇集，亦不會找該名跳槽藝人演出，目的是希望對旗下藝員公平，將資源投入在他們身上。但若是綜藝節目的話，因以唱片公司為單位，若唱片公司派出跳槽藝人參加的話，則沒有問題，變相令林峯首當其衝！

對於首奪視帝，難怪林峯已打定輸數。他與楊受成博士、「一姐」容祖兒、張敬軒及洪卓立等人出席英皇活動《英皇愛心灌全城陸運會2014》，老闆楊受成一見林峯亦笑晒口，並搭實首次出席英皇活動的林峯膊頭，非常老友。

讚英皇有人情味

林峯接受訪問時被問到是否有信心奪得視帝寶座？他竟「扯白旗」表示冇信心，更透露當日要到內地工作，故未能出席頒獎典禮：「今次冇乜信心，同埋知道機會唔大。（因為你冇約？）唔關事，我覺得自己有進步空間，覺得自己表現仲可以好啲。（你會唔會去頒獎典禮？）個日撞咗工作，要去大陸工作，應該去唔到。（你冇續約無綫，佢都畀你角逐視帝！）乜唔係嗰年有劇推出就可以提名咩，你哋問番無綫。」

自林峯離開無綫後，有指王祖藍、吳卓羲亦相繼約滿離開，問是否為自己創出一條路出來？他說：「唔關事，自己決定自己嘅路，（條路你開出嚟？）唔關事，好多前輩都開咗唔同嘅路，我只係啱啱呢個timing想試吓唔同嘅發展，所以先有咁嘅決定，（出去闖好啲？）英皇好有人情味，今次係自己正式簽約後，參加嘅第一個活動，（英皇好warm？）好滿意依家情況。」