陳凱琳出「姦」計爭獎

上屆港姐冠軍陳凱琳（Grace），出道一年就獲提名無綫「飛躍進步女藝員」與「最佳女配角」，面對下月15日的頒獎禮，Grace終於使出秘密武器爭獎！富家千金出身嘅佢毫不錫身，在台慶劇《名門暗戰》慘被強姦，勢將威脅「女配」大熱陳敏之及「飛躍」大熱高海寧（高Ling）。

迷暈別墅施暴

甫卸任就獲邀拍攝台慶劇《名門暗戰》，Grace對「處女作」自然不敢怠慢，實行瞓身演出！下星期二播出的內容，Grace慘被由舞台劇殺入電視圈的演員譚偉權（Gary）強姦。雖然身為基督徒，但佢面對被姦戲都絕冇Say No，一於豁出去！

劇情講述Grace苦戀黃浩然不果，結果搵Gary做愛的替身，但被對方報復，迷暈後帶去別墅強姦，仲被拖落地及飛埋牆，搞到嘴角流血！真係慘慘豬囉！

埋位前齊齊祈禱

對於處女下海即「被姦」，Grace坦言有難度：「睇劇本已經知有呢場戲，當時覺得唔知點演，第一次就咁盡。」幸獲監製打下強心針：「安排得你拍，就覺得你掌握到，做得到！」由於Grace與Gary同是基督徒，拍之前佢哋仲一齊祈禱，希望拍攝順利！問怕唔怕影響高貴形象？Grace謙稱：「一向都冇！拍戲係全心全意去演，唔會有香港小姐形象負擔。」至於獲提名「飛躍」與「女配」，Grace話：「好突然！有提名都好感恩，祝福所有獲提名嘅人。」

Gary反獲Grace打氣

辣手摧花嘅Gary話自己內心都好忐忑：「佢都同我講，叫我放心做。佢都好專業，拍攝時間好耐，因為好多鏡頭，攝影師同導演起初話唔夠狼，但自己又驚過火，所以好矛盾。」由於鏡頭超激，Grace要搵替身上陣，不過大讚Grace的反應非常逼真。