陳凱琳蔡思貝細訴浪漫情史

曾在外地留學的港姐陳凱琳（Grace）及蔡思貝（Sisley）同樣熱愛聖誕節，兩人曾在聖誕當日獲追求者表白，Sisley認為與心儀對象情投意合浪漫非常，收到逾百隻「情話紙鶴」的Grace卻唱反調大呼肉麻!兩人亦細訴人在異地的浪漫情史⋯⋯

融入家中

上屆港姐冠軍陳凱琳（Grace）及亞軍蔡思貝（Sisley）分別於溫哥華及德國留學，擁鬼妹仔性格的兩人皆特別喜歡聖誕節，多與好友及家人食聖誕大餐慶祝。讀書時期任家庭保母的Sisley負責照顧三名2至4歲的小男孩，每逢聖誕都會幫手煮飯及布置裝飾：「我哋朝早開始布置聖誕樹、包禮物，我負責抱啲小朋友上上落落，好溫馨！大家又會分工合作煮飯、執枱，一齊整一餐豐富嘅晚餐，通常都食芝士火鍋，有牛扒、麵包……點芝士，食完飯就會一家人圍埋拆禮物。」雖然與Grace同感香港聖誕氣氛濃厚，惟Sisley 指港人甚少以傳統方式慶祝：「因為香港人屋企比較細，唔會有棵咁大嘅聖誕樹，我哋喺德國會專登揸車去聖誕樹園，揀棵合眼緣嘅聖誕樹運返屋企。」

物輕情重

至於Grace則透露溫哥華流行玩Secret Santa遊戲，參加者事前抽一個朋友的名字，再秘密為對方買聖誕禮物，她笑言最討厭朋友送襪及Gift Card，認為最有心思是手工製作的禮物：「平日送禮物我鍾意Handmade，覺得咁樣好有意義，好似買個環保樽貼晒有回憶嘅相，或者送Photo Album（相冊）都可以長久Keep住，但Gift Card呢啲用完就冇，記得有年聖誕用咗大半日整海報，黐滿晒我同個Best Friend由Grade 9到12嘅相同戲飛。」相當有心思！

浪漫過後……請食檸檬

聖誕節予人浪漫之感！23歲的Grace現屬單身族，讀書時期不乏追求者的她大爆男生們曾於聖誕投其所好，花心思DIY禮物力追：「收過一份好有心意嘅禮物，有個男仔摺咗百幾隻紙鶴、星星放入幾個心形玻璃樽送畀我，睇到張紙有少少字，發現其中30隻，佢每日寫一張摺一隻，例如話『今日喺課室見到你，我覺得你好靚』、『今日唔知點解你冇返學，我諗緊你喺邊度』……真係Sweet 到爆呀！以前聽到呢啲覺得好肉麻，依家諗起有個男仔咁為我好好。」亦曾有追求者得悉Grace只愛吃「七彩硬糖」的其中一隻色，便買來30筒努力儲滿一樽淨色糖，在聖誕給她一個驚喜，可惜對方最終都「無功而還」：「其實我好感動，但唔想開始拍拖，我份人好直接，唔鍾意拖拖拉拉，如果係唔鍾意人又畀人感覺想開始仲尷尬！（打動唔到你？）好明白自己感受，做嘢要好集中，喺呢行都冇諗住咁快拍拖，但有呢啲回憶好開心！」實際的她寧收一盆聖誕花，環保又可長久保存。

核突膠錶　珍而重之

Sisley雖未收過DIY禮物，卻曾獲心儀對象表白及共度一個甜蜜聖誕，更是至今最難忘的一個聖誕節：「嗰次一班朋友喺瑞士滑雪，之後去飲紅酒，成班人圍住傾偈、跳舞，我同個男仔好好傾好投契。嗰日感覺好特別，雖然成晚好多朋友玩，但偏偏好似我眼中只有佢、佢眼中只有我咁，佢都有同我講好鍾意我、可唔可以做佢女朋友，感覺好似做戲咁。」至於收過最有意義的聖誕禮物，Sisley透露當時已報讀德國大學，將離開寄住家庭，獲三位小孩的母親送贈手錶：「佢送咗隻鮮橙色膠錶畀我，仲特登寫咗封信畀我話『大個女開始要睇時間做人，希望你讀大學有隻錶喺手，所有嘢都安排得好啲』，好感人！我一直戴住，直至選港姐有人話『邊有港姐戴膠錶咁核突』，我先除落嚟，但間中會戴吓。」

嫁煮飯佬 VS 自Cook自足

身為虔誠基督徒的Grace每年都會一家人參加教會慶祝活動，每家都會自備一道菜，她透露每次都由媽咪負責，最拿手是焗叉燒、糖醋骨及烤羊架，廚藝一般的Grace只負責整Cupcake。問到會否想學烹飪？她笑說：「媽咪手勢咁好就繼續畀佢整啦！（將來都要嫁人？）冇錯，有日都要學整，但都可以嫁個識煮嘢嘅男人，我覺得男仔識煮嘢幾吸引，如果返到屋企已經好攰，入到屋個男仔煮好晚餐畀你真係好幸福！我鍾意煮嘢食，但有人煮更加好，佢整鹹嘅，我整甜品，一凹一凸好合拍！」Sisley則自詡廚藝了得：「試過整間薑餅屋，要逐塊薑餅砌出嚟，上面黐好多糖去布置，好靚！其實我樣樣都識整咁滯，始終喺外國住咗咁多年都會煮嘢食，甜品、正餐、焗蛋糕都OK，以前照顧小朋友都要煮畀佢哋食，自問煮嘢食都OK！」

過去一年，獲力捧的Grace及Sisley未卸任已劇接劇，Grace更在新劇《張保仔》擔大旗，早前到橫店取景的她逗留了一個月：「要24號先返港，已經好滿足，冇乜其他物質需要，只要一家人團聚，開開心心已經係份好好嘅禮物。」她表示細佬將從加拿大回港過聖誕：「今年佢有啲唔同，香港有個女朋友，早兩日同佢講聖誕可以一齊去Coffee Shop歎番杯，佢話：『唔好意思，唔得閒陪你！』好Hurt！但都戥佢開心！（想搵番個男友？）唔會因為咁特登搵。」至於正趕拍新劇《當鐵馬遇上戰車》的Sisley則要在工作中度過：「要拍劇冇問題，上年喺香港都有同家人食芝士火鍋，都會抽時間陪佢哋。」