吳千語無悔公開戀情
20141130
東網電視
更多新聞短片
吳千語認為應該在適當時候做適當的事，所以唔會介意公開同林峯的感情。
吳千語入行四年，拍過八部電影，提名過金像獎「最佳新人」，但四年拼搏只換來「林峯嫂」的稱號，工作慘被忽略。她無悔當日被男友公開戀情，指當日男友是「在適當時候做了一件適當的事。」並坦言欣賞男友的細心和有上進心。問到婚期，她亦處處以男友事業為先，但希望婚後最少生兩個小朋友！
現年21歲的吳千語，於2010年被黃百鳴垂青，簽約天馬電影出品有限公司成為旗下力捧藝人，翌年以女主角身份擔正電影《開心魔法》，入圍提名第31屆香港電影金像獎「最佳新演員」，其後一口氣接拍八部電影，星途光明。
被爆大鑊「冇反應」
當星途備受注目同時，兩年多前與香港炙手可熱的藝人林峯拍拖，千語的名氣再被推高，「林峯嫂」地位亦被鞏固，無人不知。
當日林峯以七次「好愛」形容大家的關係，並單方面公開戀情，震撼整個娛樂圈。兩年後的今日，如果有得再揀，千語亦不悔當初「被公開」戀情：「一定會公開！公開咗好好多！當日我都唔知佢會公開大家關係，記得當日我喺內地拍攝劇集，每日晨早五點開工，當地天氣好凍，身體、情緒每日都好疲倦，個腦已經好難再Function（運作）。當日有人同我講林峯公開戀情，我仲記得當時我係『冇反應』，要過咗幾小時消化咗成件事後，先開始有反應去諗。我明點解佢會選擇公開，因為當時圍繞我哋之間嘅八卦新聞實在太多，大部分都係負面報道，你愈唔去講清楚，報道就會一篇一篇繼續推出，所以佢有呢個舉動係一件好事，個Timing係好啱！可以咁講，佢係在適當時候做了一件適當的事。」
講到悶寧願封嘴
可惜世事總難如意，戀情公開後，千語的負面新聞未有停止，亦有指事件觸動了林峯瘋狂粉絲的神經，網絡上對她作出攻擊，千語未有因而被打倒，反而變得更為獨立：「呢啲事情一定有，就算新聞都會有正、負兩面，影響一定有，負面影響都會有，但我覺得呢件事已經兩年多，我哋之間乜都被講過，負面新聞冇得控制，我覺得過多幾年，呢件事對大家唔再新鮮，就唔會再有人講。呢兩年來，分手、結婚新聞都有報道過，報道我結婚嘅次數，多到我自己都數唔到。最初我主張每次都要澄清，但依家我選擇唔講，因為連自己都覺得講到好悶。」
千語對公開戀情有另一番見解：「時下的娛樂圈已經變化咗好多，唔少藝人都會公開戀情或者公開婚訊，乜嘢都收收埋埋、隱瞞會令人過得辛苦，甚至以讀者身份去睇藝人嘅結婚、訂婚消息，自己亦都會戥佢哋高興。」但對於婚姻，千語坦言對她來說是一件很遙遠的事：「適婚年紀會係三十五歲之前，因為緣分大家都唔使去諗，對方手頭上仍有好多工作、好忙，依家一定唔會係適當時候。我覺得每個人總係需要一個事業上嘅成就，男人達成事業會有一個成功感，當佢自己覺得可以去到另一個階段，就會諗另一件事，相信佢現階段仍未達到最滿意嘅位置！」
男友係咪靚仔？
曾有指千語對男友林峯諸多要求，她即否認，並強調：「絕對冇對佢要求過乜嘢！話我叫佢唔好做、話要買車、買樓、買手袋，最記得話我要男友攞八百萬現金，實在太誇張、太層出不窮。不過經理人公司比我更緊張呢啲新聞，每次有呢類新聞都希望我澄清，因為擔心報道對我形象有影響，但如果我每次都逐一澄清，下次銀碼會愈寫愈大。」
究竟林峯憑甚麼奪得女友歡心？千語大讚男友成熟穩重：「我唔係特別留意佢係咪靚仔，我比較欣賞佢嘅低調，唔係Bla Bla Bla嗰種男孩，佢好努力工作、上進，成熟又穩重。佢性格好好、脾性比較慢，我反而急進，係一個緩和。」她指大家同在娛樂圈工作，會更易溝通和產生共同話題，避免了很多不必要的麻煩：「同一行業好處係更了解對方工作，聽過有女藝人講拍戲會令另一半產生誤會，同行大家了解工作性質，明白工作上是非係避免唔到。」
生兩件退出幕前
千語揚言婚後不會退出幕前，但若懷孕則另作別論：「如果有小朋友就有可能退出，因為小朋友唔可以交畀人湊。我本身係獨女，細個嗰陣左手同右手玩，所以我希望最少生兩個，最好係女，不過生兒育女對我嚟講仍然係一件遠嘅事情。」
父母反對變支持
無獨有偶，千語在新片《青春鬥》中飾演獨女，父親有錢，但沒時間看管下，令她性格刁蠻任性。她指現實中絕對沒有港女病及公主病，而且與家人關係一直好好，由當初反對她入娛樂圈到現在抱支持態度，她感激家人支持：「一開始家人唔支持我入行，可能佢哋比較留意娛樂新聞，對娛樂圈印象唔太好，擔心我花咗時間喺娛樂圈但未能得到任何成績，又會擔心我工作上有挫折而唔開心。直到我喺娛樂圈拚搏咗一年多，佢哋開始明白我唔係玩玩吓，感受到我真心想喺演藝工作上發展，畀我嘅行動證明而打動，佢哋開始接納我呢份工作。」
「如果當日我係要簽一間大型經理人公司嘅話，我相信家人會更反對！幸好黃百鳴主力開拍電影，旗下藝人唔多，加上黃百鳴喺圈中形象正面，令我父母更加放心將我交畀佢照顧。黃老闆當日同我父母接觸過好多次，給予我父母好大信心，最終畀佢嘅誠意打動同說服，撮合咗大家嘅合作。」
搵銀密謀做業主
踏入娛樂圈工作，難免與家人相處時間減少，貴為家中掌上明珠，千語會抽空與家人共聚：「如果係拍戲嘅話，真係會減少咗同家人見面時間，但平時都經常同家人一齊食飯。有時拍戲會演繹好多角色，返屋企想一個人靜吓。但父母反而開心咗，因為佢哋覺得我入行後變得更懂事。」她希望可以在娛樂圈有搵錢能力外，當然最希望有好作品給家人及朋友欣賞，分享她在圈中的成績：「雖然我知依家呢番說話仲離我好遠，但希望有經驗後可以慢慢做出嚟。」她自言好彩，家中沒有經濟負擔，可以讓她將全副心機放在工作上，可以趁後生拼搏之餘，亦定下五年內置業的目標：「儲到錢當然要照顧家人，自己亦想置業，不過樓市高、實踐難，要再努力專心工作。」
除了家人和感情，吳千語亦很重視友誼，但數圈中好友不算太多，同是模特兒出身的楊穎（Angelababy）算是好友。她指大家認識時間不算太久，但因大家的星座關係變得合拍，話題上可做到無所不談。千語自認圈外朋友比較多，過往有份演出的電影首映，他們亦會出席捧場，因為希望朋友可以分享她努力工作的成果！
車當床攰到瞓
即將上映的新片《青春鬥》中，千語有新嘗試：「今次個角色好多動作戲，雖然唔係要我好好打，但都要有好強功架，吊威吔次數好多，着上威哋網感覺令我抖不過氣，令我連飯都食唔落，我真係好佩服所有動作片演員。」她指拍攝《青》片的同時還要拍攝另一部電影《王家欣》，當時體力透支，攰到不想說話，經常在車程上睡覺，車上變了她另一個家。
娛樂圈女星青黃不接局面持續惡化，千語入行四年至今共接拍了八部電影，成為影壇新貴獨當一面，她說：「我都聽過近年男、女新演員機會唔多，大部分電影都會搵舊演員演出，好少電影畀機會新演員，我知道自己好好彩！」
多謝黃百鳴！
她感激公司給予發揮機會：「真係好多謝我嘅伯樂黃百鳴老闆，同佢個仔黃子桓，佢哋寫咗好多好好嘅劇本、角色畀我去演。娛樂圈工作，公司同藝人之間關係好重要，黃老闆雖然好少說話，但我知佢關心我，支持我做任何嘢，希望有多啲時間可以到佢屋企享用佢太太嘅豬肺湯！」談到電影頒獎禮的成績單，千語坦言對她來說是遙遠的事，但會透過努力和經驗累積做到最好，希望有朝一日有所成績，拍一部代表作，令大家留下深刻印象。
後記：半熟少女情懷
吳千語年僅21歲，初出道時接受訪問多一點稚氣。四年後的今日再接受專訪，談吐表現比過往成熟兼大方得體，甚至談到男友林峯亦從容不迫，未有迴避，談話內容亦處處為男友着想兼笑容滿面，充分表現出少女情懷。鏡頭後她亦表現獨立，雖然有經理人及助理在旁協助，但無論換妝、換衫都親自打點，表現成熟。