香香要男友煮得又洗得　祥仔嘲笑搵「賓仔」？

藝人黎耀祥（祥仔）於尖沙咀拍攝由岑麗香（香香）及麥長青主持的無綫節目《明星愛廚房》。期間熱愛下廚的祥仔大讚香香為人賢良「食得」，更向鬼妹仔的對方傳授廚技。祥仔說：「教佢用南乳煮餸，今次應該係佢第一次食南乳。（教得棘手？）冇，佢好聰明，直頭賢良『食得』！」祥仔更自爆將與家人到日本北海道旅行：「本身想過埋聖誕節先返，但遷就番無綫頒獎禮同《名門暗戰》大結局嘅日子，所以提早咗去旅行！」

要求男友「一條龍」服務

至於香香自爆擔任主持感緊張：「集集都要煮嘢食，（廚藝如何？）學習中！」問到她曾否為男仔下廚，香香說：「煮過畀父母食，以前讀書同朋友開Party都會煮。」談到廚技高超的男仔會否在她心目中「加分」，香香要求對方應煮飯及洗碗「一條龍」服務：「唔止識煮，煮完洗埋碗就最好！不過一齊洗碗都好浪漫！」身旁的祥仔又不禁取笑對方似乎需要「賓仔」多於男友，場面搞笑！