AKB48襲港　三女鬥踎鬥起飛腳

日本女團AKB48今日派出三位人氣成員西野未姫、北原里英、小嶋菜月旋風式襲港，並於西九龍中心舉行握手簽名會，獲約400粉絲圍觀撐場。三女甫出場即以唔咸唔淡廣東話打招呼，菜月更因發音不準疑似講粗口，惹來全場大笑，首次來港的未姫更以廣東話表示：「見到大家好開心。」標準發音獲全場鼓掌。

想食擔擔麵

已來港數次的里英，耍冧表示4年沒有跟香港粉絲見面，非常想念大家，她又搞笑自嘲唱功水皮。未姫則大讚香港高樓大廈色彩繽紛很可愛，菜月則表示想品嘗香港美食和睇夜景。三位成員又齊心表示想吃擔擔麵、芒果布甸和飲茶食燒賣等。

之後，三女抽出並贈送簽名新碟給三位幸運兒，再唱跳兩首Hit歌包括《戀愛幸運曲奇》等。由於三女的跳舞動作幅度頗大，又踢腿又轉身咁，搞到裙底春光若隱若現，令現場氣氛更加熱熾。最後她們與約600名粉絲簽名握手，有粉絲更高舉勝利手勢大叫。