張繼聰唔敢諗奪獎　驚到騰騰震

藝人張繼聰（Louis）在無綫劇《忠奸人》和台慶劇《老表，你好hea！》大放異彩，早前更在被譽為台慶頒獎禮前哨戰的《星和無綫電視大獎2014》中憑《忠奸人》奪得「TVB最佳新人」，因此在《萬千星輝頒獎禮》「最佳男配角」角逐中勢成大熱，而他亦有份爭奪「最受歡迎電視男角色」、「飛躍進步男藝員」、「最佳節目主持」等獎項。

一直以新人態度看待拍劇的Louis就坦言：「我好怕做演員做得耐咗就會鬆懈，《星和》個獎對我嚟講係個提示。」他亦謙虛地話自己未諗過與任何人一爭長短：「諗太多一定會驚到騰騰震！」更笑指屆時入場是近距離做觀眾：「到時我一定寸其他人『好緊張呀？』」有人讚他做戲夠爽夠狂妄，他就指因為自覺沒有包袱：「仲有因為我提供唔到『靚仔』呢樣嘢！」

睇好安仔奪視帝

談到視帝爭奪戰，他直言太多優秀演員難以比較，但自己就偏心於郭晉安：「我平時同佢傾偈都傾到難捨難離，做戲嚟講佢係最頂級嘅演員，同佢拍《忠奸人》嗰時成日都想打佢。」更指亦師亦友的安仔是真正的高手：「佢欣賞我嘅演繹，唔會壓制我，仲任我做，但點都接到我嘅戲。搞到我好似佛祖手裡面嘅孫悟空，跳嚟跳去都走唔出佢五指山！」

至於視后，他就睇好《使徒行者》中的「釘姐」佘詩曼：「佢有經驗得嚟仲好癲。我恩師林立三話觀眾想睇你做戲，係因為觀眾想做但係現實生活做唔到，而阿佘係完全做到。」