甄子丹家有「旺」妻身家翻倍

「宇宙最強」甄子丹除了擁有超強事業之外，還擁有一位又靚又叻的「幸運妻」汪詩詩，詩詩自2003年嫁入「甄」家門，子丹便行運一條龍，事業如日中天，大女兒甄濟如、兒子甄濟嘉出世時，甄子丹均奪得金像獎最佳動作設計，而2008年《葉問》系列更奠定了他在影壇的巨星地位，成為了今日的「宇宙最強」！

當得上「幸運妻」，當然不止帶給丈夫好事業那麼簡單，持家有道的汪詩詩，多年來為子丹投資房地產，令子丹財富日日升值，幾年來手握多個豪宅，市值近三億元！2011年，詩詩更轉攻商廈，以一千六百二十萬投資黃竹坑工廈，之後隨着公布黃竹坑興建港鐵，令該工廈價格極速上升，三年後升至三千一百萬，接近一個「double」，眼光之精準拍得住子丹拳腳，幫老公投資頓變「女樓神」，認真厲害！

黃竹坑工廈升值潛力相當之高，子丹夫婦不急於放售，詩詩還花足心機為物業布置，把4700呎工廠大廈「變身」成為甚有心思的「子彈工作室」，辦公室、放置獎項與戲服的「燈影走廊」、百變會議室、私人電影院、酒窖等，一應俱全，堪稱「宇宙最強」工作室！《好報》登堂入室逐格睇，每個位都是亮點！而子丹與詩詩早前更在該「宇宙最強」工作室接受獨家專訪，談到今次投資工廈的經過原來都有段故！

詩詩笑言：「三、四年前，我想搵個地方專門放有關子丹電影嘅物品，好似戲服、獎座咁，因為我覺得分散咁放唔夠集中，我想集中啲，所以開始睇面積較大嘅工廈，曾經試過搵一啲細間嘅，一層樓有好幾個單位，但我又覺得子丹出入唔係咁方便，所以，就去睇一梯兩伙嘅，之後就留意到呢個業主打通晒，成層樓得一伙嘅單位，開頭老公都唔係咁贊成，始終交通唔係咁方便，而我亦明白老公賺錢好辛苦，所以投資都好小心，就算我第一眼好鍾意呢度，都會睇定啲先。」

詩詩原來跟子丹一樣，都有一位「幸運人物」那就是她的媽咪，詩詩凡有任何問題都最愛找媽咪商量，詩詩表示：「我媽咪好厲害，雖然佢無乜經驗（投資房地產），但我好信媽咪嘅眼光，我帶媽咪嚟呢度睇，佢話支持我，我即刻放心晒，好似當年我結婚咁，都係媽咪支持，而家都ok啦！媽咪係我嘅幸運星，有佢支持，我可以好安心咁去做決定。」

一向痛錫太太的子丹，對於詩詩最後堅持投資當然尊重，並由太太執掌投資大權，讓她負責去跟業主斟洽買賣事宜，而詩詩在買賣過程中亦花了不少心思，詩詩透露：「當年我公公有癌病，我要經常往返香港、美國，所以我都無急住去傾，但到後來我發現呢個工廈嘅價錢，一個月裏面升得好快，當時我都唔知原來喺會起港鐵，所以當業主話連埋車位放售，我即刻去掃，傾緊嘅時候，我知道咗原來將會有港鐵，我又擔心業主會改變主意，因為之前我遇到一啲業主，係咁同我玩價錢遊戲，經常改變主意，我好唔鍾意咁，我希望一就一、二就二，一切順順利利，咁啱經紀話畀我知個業主生日，我就同個業主講，生日收錢吉利呀，業主都應承收票，我就即刻叫經紀幫手送支票畀佢，完成交易，個幾星期後，個業主都知有港鐵，咁啱大家喺電梯度撞到，佢笑笑口同我哋講：『你知唔知我係你老公嘅粉絲，但我唔知呢度有港鐵架！不過，無所謂啦，我好鍾意你老公嘅電影。』」