陳展鵬撐馬國明攞視帝

備受無綫力捧的陳展鵬，憑劇集《叛逃》成為候選視帝，早前已憑該劇開齋成為新加坡視帝的他，笑言並未因此感到有壓力，並謂攞獎要看天時地利人和，陳展鵬感慨謂：「呢套劇係倉底貨，雪咗3年先播，如果當時承住個勢好啲，不過依家打完底（攞獎）之後都唔驚凍！套劇係咁多套最辛苦一套，減咗10幾磅，出到街已執身彩。」

撐阿佘攞視后

無綫藝員訓練班出身的陳展鵬，曾效力亞視6年，及後於08年重返娘家，繼而參演多部劇集並攀上一線小生位置，展鵬透露這段時間獲益良多，因能與眾多資深前輩合作：「呢樣嘢比攞獎更實在，其實我對《叛》劇係有信心，但最想馬國明攞視帝，因為大家出道時間差唔多，黎耀祥同郭晉安係大熱，咁佢哋都攞過晒啦！畀啲機會其他人嘛！視后就梗係佘詩曼啦，佢太犀利嘞！」