郭晉安將全家着上身攞視帝

郭晉安揮低一眾勁敵，勇奪視帝，更獲得了超過60％的專業及全民肯定。郭晉安上台攞獎前，與一眾花旦擁抱，其中田蕊妮及新鮮出爐視后阿佘表現最為感動。

去年失落視帝的張智霖，今年大方擔任視帝頒獎嘉賓，不過他宣布得獎名單時卻開了個小玩笑，直指「無嚟都可以攞獎」，此時，台下的安仔即表現嚴肅，正當大家以為張智霖想宣布林峯攞獎時，他卻讀出安仔的名字，令全場舒了一口氣。而張智霖不但給安仔來個擁抱，更邀請安仔自拍，期間更不忘嘟嘴搞氣氛，場面搞笑。

安仔致辭時表示：「我每日都有諗上台要講咩，但我好亂，我好興奮可以拎呢個獎。唉，開心到唔知講咩好。今日我送囝囝送學，我話爸爸今晚陪唔到你，因為要參加頒獎禮，囝囝話叫我攞晒啲獎返嚟。我同佢講，阿囝，其實我已經攞晒啲獎，你同阿囡出世後，你哋令我培育咗愛心，令到我推翻咗一啲我唔應該有嘅性格，例如妒忌心、自大同驕傲。推翻晒呢啲嘢，我先發覺我可以好自然、好舒服咁面對我嘅職業，可以好自然流露表情，所以我好感謝我嘅仔女。」之後郭晉安即發表感人言辭：「雖然我嘅仔女唔能夠嚟，但我已經將佢哋兩個嘅樣印咗喺我件衫上面。另外，呢件衫亦係我第二次着，第一次着係我結婚嘅時候，我好多謝我太太。」安仔說到此處即嗚咽，並謂：「多謝你一直咁包容。」場面感人。