張慧儀讚養子又乖又懂事

張慧儀出席慈善晚宴時透露，聖誕節會留在香港陪伴養子：「雖然聖誕期間都有啲工作，我都會爭取留喺香港陪囝囝慶祝，我想同佢喺香港玩，例如帶佢上山頂行，坐吓啲開篷旅遊巴，同埋帶佢去離島玩，我同佢搬返嚟香港住不知不覺都一年八個月，但都未有時間帶佢四圍去玩吓遊覽吓。（你工作咁忙，囝囝有無投訴？）無，佢好乖好懂事，我有同佢講話媽媽要搵食要工作，唔係點應付生活？點做到我哋想做嘅嘢？佢都好明白。佢其實好老積，又好錫我，有次佢喺學校祈禱話今日我媽媽生日，叫其他同學仔一齊為我祈禱，又考到兩個一百分送畀我做生日禮物，話最珍貴係媽媽，我真係覺得好安慰。」