周慧敏自爆有怪癖　錄音時冇面見人

周慧敏（Vivian）事隔十七年再出大碟，她出席新碟發布會時，獲好友古巨基神秘現身撐場，基仔表示出發前在髮型店撞到Vivian：「我話要飛，因為想畀驚喜佢，嚇佢一跳，其實我等陣真係要飛。」今次基仔有份為Vivian新歌擔任歌曲監製，基仔笑言在錄音時有擺監製款。

笑基仔奄尖

Vivian表示由基仔擔任大碟第一首歌的監製，為她打了強心針：「我太耐冇做大碟，以前好多錄音固有模式都要放低，有個熟嘅人幫我起步，有好大安全感。」她又自爆錄音時有怪癖，除了一定要着平底鞋外，由於錄音時會七情上面，擔心被人看到很OVER的表情，所以每次錄音都無面見人，更曾要求基仔要用毛氈擋住玻璃窗不讓外人看見自己。她又指基仔有監製氣場，二人都奄尖要求高，需錄第三次才找到最好的演繹方法。

唔敢八卦基仔係咪做老竇

對於《東網》披露基仔快將做老竇，Vivian表示：「有好多傳聞，我唔敢八卦，唔想增添佢煩惱，如果係真，佢會話我聽。」問到可有見過古太Lorraine？Vivian說：「有見到佢，冇留意佢身形，依家仲係動如脫兔，冇問過佢有冇需要BB，之後會問佢。」