王菀之爆軒仔自拍腹肌四圍Send

歌手王菀之（Ivana）為自己編製的琴譜舉行記者會，她出動到自己的古董琴與好友Alex Fung合奏兩曲，但一位神秘嘉賓突然扮成工作人員上台，此人就是她的另一位好友張敬軒！軒仔更帶來了「大隻奶粉」作為賀禮，二人不時在台上鬥嘴，非常搞笑。之後大會又安排了一位七歲的小孩彈奏Ivana的歌曲，在旁的Ivana亦聽得如痴如醉。

爆軒仔自戀

受訪時，對於軒仔神秘現身，Ivana笑言：「本身有一吓感動，但本能反應係鬧佢，邊有人喺啲咁浪漫嘅場面送啲咁嘅嘢架！」她認為軒仔常吃「大隻奶粉」就順手帶給她，更大爆對方練完腹肌後會拍照，再發放到群組給其他人看，非常自戀！

被軒仔嚇親唔敢拆封

而提到她的古董琴，Ivana説：「係用象牙整架，買嘅時候部琴有九十九年歷史左右，不過呢啲琴要過一百年先可以出口，加埋運送嘅時間，所以我都隔咗好耐先真正擁有佢。」她又透露花費了六位數字去購買，不過因為軒仔的說話卻一直未有拆封：「張敬軒係咁嚇我話『夜晚佢有無彈琴畀你聽呀？彈咩歌呀？』講到好似一部好鬼魅嘅琴咁，搞到我好驚！另一方面就怕會整花部琴。」她又表示之後會把琴放在軒仔家中。

軒仔難忍年輕人「冇家教」

而軒仔就表示知道Ivana不眠不休去籌備樂譜，身為朋友當然要支持，更謂送「大隻奶粉」是有原因的：「希望佢本樂譜同事業都可以發大，同埋期待佢有六舊腹肌！」至於會否推出親自編製的樂譜，他謂有想過，但太辛苦，之後更笑言：「不過我知出樂譜係會發達架！」而提到他在Instagram上以粗口罵粉絲一事，他表示無法忍受現在的年輕人這麼「冇家教」，但之後已經把留言刪除：「想畀佢哋感受吓，我出完氣就算喇，都做唔到啲咩，我覺得女仔人家講晒粗口唔好聽，同埋追星啫，做咩要互相問候人哋屋企人。」