黃智雯32歲生日獲「夫君」陳山聰祝福

藝人黃智雯尋日32歲生日，但單身嘅佢一啲都唔Dry，除咗有電視台一班好同事同佢慶祝同切蛋糕之外，同劇嘅陳山聰對壽星女都非常肉麻，以劇中「夫君」嘅身份同佢講：「夫人's 生日快樂，祝妳永遠都開心、幸福、健康、快樂！」收到祝福嘅黃智雯大為感動，佢話：「多謝我的戰友們，兄弟姊妹們，雯粉們跟我過了一個開心的生日週（周），許左（咗）好多個願望，我要您們天天快樂，友誼萬歲！」人緣甚佳嘅佢上載生日合照上到手軟，真係溫馨啦！