跌倒傷及盆骨左膝　林夏薇堅持開工

無綫女藝員林夏薇最近與楊怡、張繼聰及楊明等拍攝劇集《逆戰塘西》，昨晚她在電視城開工時不慎跌倒受傷，整個人倒在地上，跌傷盆骨及左膝，發生意外後，現場人員即急急上前扶起夏薇。起來後夏薇的膝蓋位腫起一大片及感疼痛，她即前往求醫及照X光，幸好沒有傷及筋骨。

堅持死頂開工

夏薇接受電話訪問表示醫生建議她要休息一段時間，但她堅持死頂開工，繼續返公司拍攝一場跳舞戲：「我仲行到路，而呢場跳舞戲我唔係主要跳舞嗰個，希望唔好影響到。（休息吓？）醫生知我仲要開工都好驚訝，但個景係最後一日，我唔想影響到人，點都要頂硬上，醫生開咗啲止痛藥同藥膏畀我。」

楊怡望夏薇冇事

目擊證人之一的楊怡表示大家見到夏薇受傷都大為緊張，她擔憂地說：「驚佢真係撞到內傷，見到佢盆骨整親，好擔心，女仔呢度受傷好麻煩，希望佢冇事！（驚影響拍攝進度？）佢咁硬淨，唔怕嘅，就算係休息都應該。」至於劇集監製方駿釗表示有致電夏薇慰問，相信其傷勢不太嚴重：「知道佢行路有啲痛，文戲係ok，如果有大動作嘅嘢會盡量安排替身。（佢有冇要求停工？）佢好專業，堅持開工拍埋佢，套劇要拍到一月底。」