「尹律師」朱慧敏近況更新　冇劇拍焗住賣包

藝人朱慧敏到演藝學院，欣賞粵劇名伶龍劍笙演出的《任藝笙輝念濃情》，她說：「我鍾意粵劇，細個住北角新光戲院附近，受家中長輩影響，都鍾意聽粵劇，仲令我想做演員，但我就冇去學粵劇。」她續說：「如果畀我揀，我會想做花旦，雖然以我身高、聲線，好似做小生好啲，而且我做花旦嘅話，可能好難搵到咁高嘅小生襯我，所以我反串做小生都得！」

提到與無綫合約，她說：「仲有年幾啦，暫時未有新工作安排畀我，我都想拍劇，或者試吓做舞台劇，呢輪就留喺餐廳幫手招呼客人，收銀同賣包，幾開心，幾得意。」