大陸被指曾拍三級片　林心如出律師信以正視聽

早幾日正當大家開開心歡度聖誕佳節時，台灣藝人林心如就真係唔多開心，事關本月26日無端端喺網上有人發微博直指林心如曾經拍三級片，發博文位仁兄係經微博驗證職業為作家，有部份網民見佢夠膽真身上陣爆大鑊都信以為真。林心如嘅工作室見情況嚴重，立即出律師信要求對方刪除博文及公開道歉，出信唔夠半個鐘，作家兄立即刪除微博及發文道歉以圖平息事件，林心如工作室會唔會算數就未清楚，不過有唔少網民就拉埋早前于正抄襲瓊瑤一事嚟講，問啲作家講嘢仲信唔信得過喎？