萬綺雯黃心穎睇王浩信除衫流口水

藝人萬綺雯（蚊蚊）及黃心穎於電視城拍攝無綫劇集《東坡家事》，期間女扮男裝的心穎更以Chok樣輕托蚊蚊下巴仔，場面搞笑！

自爆劇中形象百變

問到心穎為何扮男仔示人，她自爆於新劇中形象百變：「我唔止要扮男仔，仲扮過喪屍！」於劇中與王浩信飾演鬥氣冤家的心穎笑稱被對方的爆肌身材迷倒：「我喺劇入面好恨嫁又鍾意靚仔，今次我扮男仔潛入場館，去偷睇佢摔交！（佢會半裸上陣？）係呀， 佢係『古代撒亞人』，一睇佢除衫就鍾意咗佢！」問到心穎於現實中是否同樣鍾情肌肉男，她笑說：「OK啦！我冇要求，但見到對隻眼都好！」

大讚浩信身材應有盡有

身旁蚊蚊亦搞笑大讚浩信身材「應有盡有」，更引得同場演員High到流鼻血：「佢練到好結實。（有腹肌同人魚線？）咩都有，要有嘅都有齊！佢拍之前仲會狂舉啞鈴同做掌上壓。佢之前都有場除衫戲，講佢一除衫令女Fans興奮到掉晒啲頭飾，仲睇到流鼻血！」

問到二人當時有否流鼻血？心穎笑稱睇到「流口水」：「冇，但睇到流口水，因為拍到好肚餓！」而蚊蚊亦自爆「為食」，又稱讚浩信「忍功」了得：「流口水係因為我哋為食，之前喺片場同蝦頭（楊詩敏）慶生，佢一啖蛋糕都冇食，好欣賞佢嘅毅力同努力！」蚊蚊更大爆浩信做齊功課開工：「佢仲有本功課簿寫低細節，似足中學做報告！」