蔡思貝激推偶像黃德斌做諧角

藝人蔡思貝在啟德郵輪碼頭拍攝《當戰馬遇上戰車》追車戲。就算寒風凜凜，但她仍然頂得住：「攝咗個暖包落背脊頂住！」而在劇中飾演黃德斌徒弟的她就指終於可以與師傅拍住上巡更：「（劇中）佢係我偶像，一路都好想Part佢，但Part佢係件好困難嘅事！」

唔對德斌發電

問曾自認「發電廠」的她有否電德斌，她即謂：「我點解要電佢！我同德斌好搞笑，成日都互窒。唔知呢，佢同我都冇乜Generation Gap（代溝）。」認為對方講得笑的她更想推薦德斌做諧角：「所以我成日都同德斌講，覺得佢應該畀私底下嘅呢面監製睇，咁啲監製就搵你做滑稽角色。」

入戲整親腰

問她拍劇時需否坐鐵馬？她就坦言因有替身所以不用親身上陣，但仍有為救德斌而被胡諾言打到遍體鱗傷的危險場口：「但拍攝時我真係唔小心整傷。可能係入戲嘅關係，喺廠拍，我就整親條腰。嗰時係要抆我出鏡，同時我又畀人打到冇哂力，我真係放鬆哂，一Chok就真係飛咗出去，條腰落地。」又指針灸幾次後已經好了點：「拍出嚟真係有個效果，因為真係痛！」

呻冇愛情線

而她又透露在拍此劇體驗了首次特技化妝，更謂：「隻眼要好腫好腫，所以要專登嘥一日去倒模、整個妝，整出嚟自己都覺得好得意。仲講我搵把刀自己劃開眼啲膿出嚟，先瞄準到支槍。所以成日話希望到時出到街，因為拍出嚟好重口味！」至於有否親熱戲，她就直言連愛情線都冇：「唯一就係我鍾意咗胡仔，但佢追我係為咗報仇囉！但其實唔係愛情線，因為未開始過佢就已經報仇喇！」