陳豪陷人潮　走難咁款先成功甩身

陳豪偕同母親出席上水廣場倒數活動，透露懷孕7個多月的太太陳茵媺（Aimee）情況良好：「啱啱先覆完診，佗得比上次舒服，係個肚大咗，但就唔太辛苦，整體上係健康同開心，因為個仔都一歲，所以都要灌輸佢知嚟緊有個細佬。」

對於Aimee近日公開表示想追個女，陳豪得戚地謂：「係我講先架！不過大家想法都一致，要多個女唔大問題，有個女係開心。（會唔會問人生女心得？）都想，但會畀Aimee休息吓，我個新劇希望新年前完到，到時都會放假陪太太。（會唔會叫公司幫你放假前接多啲工作？）多啲嚟密啲手囉！」

向來甚受歡迎的陳豪，活動上大顯親民本色落台與現場觀眾握手及GIVE ME FIVE，不過卻因有觀眾太熱情，拉住陳豪隻手唔放，搞到他相當尷尬，更一度要走難咁款才能成功脫身，場面搞笑。