盧頌之「降呢」床戰陳恩碩

藝人邱美薇（Chelffy）、模特兒盧頌之（DaDa Lo）以及演員陳恩碩（Tom）在本月九號起舉行三場舞台劇《血染謎情》，故事講述要有幾多人犧牲，才可以延續DaDa的生命。Chelffy坦言今次挑戰甚大，除要飾演妓女外，更要壯烈犧牲：「因為DaDa嘅媽媽救咗我之後死咗，我就要照顧佢，而佢喺劇中係一個吸血鬼，所以就要做妓女幫佢搵血。同埋我個角色最後會死，新年年頭咁樣好大吉利是，但劇團就鍾意突破，我自己覺得喺觀眾面前咁演都幾大挑戰。」

至於DaDa則大爆與Tom會有「床角」戲，並會「降低」年紀與Tom拍拖，她說：「我哋入面就係做一對16歲嘅情侶，Tom就真係16歲，但我就大佢9年，對我係挑戰。再加上我哋到時會有床角戲，張床係會斜，我就問Tom會唔會跌落嚟。」問到DaDa會否邀請男友趙勁皓（King）到場支持？她竟表示不好：「其實我叫佢唔好嚟，因為劇入面我要唱歌，佢知我歌藝係點，我平時連K都唔唱，所以今次真係新嘗試，好想同大家分享呢一刻，依家係練歌多過要記台詞。」

而年紀只得16歲的Tom，原來舞台劇經驗豐富，在劇中擔任多個身份：「我係做編劇、作歌、填詞 、主演同導演，靈感就係來自一本瑞士小說，覺得好有意思，所以就拎出嚟演。（當時寫劇本有冇話係諗定邊個人去演？）全部都係寫完先搵人去做，所以想點寫就點寫。」