馬德鐘帶威士忌食結局飯　揚言唔飲醉

馬德鐘、王君馨及李思捷等到西貢食飯，兼欣賞無綫劇集《飛虎II》大結局，馬德鐘㩦酒到場，他說：「我帶咗支威士忌嚟，但唔會不醉無歸，因為聽日要飛上海出席簽約新公司儀式。《飛虎II》喺內地都好好反應，之前返去做嘢，好多工作人員追問我會唔會同鍾嘉欣係埋一齊，其實我都未睇，唔知監製個結局點剪。（對收視有信心？）希望30點啦！」

王君馨練好中文搵人仔

君馨則說：「我希望有機會都可以演女飛虎，想練吓啲腹肌。（結局飯得你同胡定欣兩個女將？）鍾嘉欣返咗加拿大，我今晚都要開廠拍《性在有情》，睇一半要走啦！我哋飛虎有個group chat，原來《飛虎II》內地有8億點擊，好犀利！（想食住個勢接內地job？）之前都拍咗部電影，要素顏演出，我發現同內地導演、演員合作，有好唔同嘅火花，我希望練好啲中文，咁做起戲嚟就可以自然啲。」

李思捷節目緊接播出

李思捷主持的《今晚睇李》將緊接《飛虎II》的周日檔播出，飯局上馬德鐘搞笑地將一盆花轉交思捷，希望他可以承接好收視，思捷說：「盡我所能啦，我enjoy咗個過程先，呢個節目形式我想做好耐，已落實咗會上嚟嘅嘉賓有吳君如、毛舜筠、周秀娜，我仲度咗好多散gag，好似以前鬼馬雙星咁，希望觀眾喜歡。」