馬賽情緒低落愛犬幫度過難關

藝人馬賽帶同愛犬一同出席狗隻慈善步行，她坦言自己首次參加此類活動，平日常帶愛犬到狗公園。她笑言愛犬性格有點怕醜，每當有訴求時卻會喊。另外，她透露正忙於拍攝劇集，稍後將到大陸拍攝外景，預計拍至2月底，故新年亦在拍劇中度過。

問到有沒有去旅行的計劃？她說：「拍完劇先算，想抽多啲時間陪狗仔。有時我半夜返屋企，佢會周圍痾尿，因為佢發脾氣。」她坦言愛犬在她早前情緒失落時陪伴住她，並說：「佢係好情緒化嘅，同我好似，我開心佢就開心，我唔開心佢都唔開心。狗仔真係人類好好嘅朋友。（搵狗仔陪好過搵伴侶？）狗係一生一世嘅，伴侶好難講。以前忙嗰陣，覺得要做嘢先，但宜家要諗多啲佢嘅情緒。當我唔開心嗰陣，佢喺我身邊，真係好溫暖。」她又表示自己自去年開始信佛，並希望下世愛犬投胎做人，做她的孩子。