蕭正楠黃翠如合巹交杯　肉麻放閃！

蕭正楠和黃翠如自公開戀情後，首次同場宣傳主演新劇《師奶MADAM》，甫到場亦即應要大方合照，又毫不避忌搭膊頭兼作狀互相揮拳，sweet舉動即令台下一眾粉絲起哄！

席間，一眾演員曹永廉（阿廉）、黃智雯等又擺「如楠戀」上枱，安德尊更以「一對新人」介紹二人出場，當司儀趙永洪問到何時結婚？他們即一臉尷尬，蕭正楠笑謂：「結咗婚啦喺戲入面！」問可覺得翠如靚女？他又說：「靚！你（翠如）表現好啲呀！」隨後，大會又安排演員們合巹交杯，惟翠如翹手後表現怕醜拒飲，此時，阿廉打趣道：「你哋都要練定先！」趙永洪又祝他們「百年好合，永結同心」，猶如預演婚禮一樣！

在台上獻唱主題曲《I always be yours》時，阿廉又提議蕭正楠拖着翠如唱，不過女方尷尬極速逃跑，後來又借粉絲的花送給男友補數，大放閃光彈！

冤氣打情罵俏

受訪時，記者笑指兩人sweet到痺，翠如即笑道：「唔係，我哋好憎大家喺戲入面。（現實呢？）我好入戲，依家好不和。」蕭正楠又自爆特地穿上女友所送的白波鞋，他說：「我好隆重其事呢個記者會，連佢送我嘅聖誕禮物都着埋出嚟，係潮男恩物。（送返乜畀佢？）我一陣會上台唱歌送畀佢。」之後在台上大合照時，本來打算踎在前排的蕭正楠，又大叫：「對鞋唔屈得㗎，係禮物嚟架！」對女友的禮物可謂珍而重之。

問到是否兩人的定情之作？翠如否認：「唔係，但呢套劇有好多難忘片段，我哋嗰時好唔熟，有場要我嘔落佢身到，但我嘔極都嘔唔到，後來佢帶我去一邊學嘔。」蕭正楠即自嘲：「望住我都嘔唔出。」追問何時定情？他說：「呢套係同事關係，拍完後變朋友，隔咗段時間就變戀人。」拍攝時日久生情？翠如表示拍攝時視對方為敵人，開機前對戲也不讓對方知點做戲。

情人節想一齊工作一齊過

提到二人不乏打交場面，問到是否錫住女友打？蕭正楠說：「完全冇，但好難打，佢骨杉杉咁，打完仲痛過佢。依家好啲啦，佢肥咗3磅，我就肥30磅，成日帶佢去食好多嘢，但佢都唔吸收，所以嚟緊新劇我要減肥。」刻意谷肥男友？她說：「唔係呀，佢見我食，佢又食咋，我食得多過佢，依家好啲。」

有傳該劇因緋聞而延後播出，蕭正楠解釋：「劇幾時播係公司安排，但情人節前播都幾好，係個好好嘅timing。」至於情人節會否出埠慶祝？翠如說：「睇吓套劇收唔收得啦。」二人又異口同聲希望可一起工作度過搵銀兼過節，問到準備甚麼禮物給女友？蕭正楠笑謂：「呢首歌囉，佢好簡單架，首歌叫《I always be yours》，即係我永遠屬於你嘅，咁有意義仲唔收貨。」翠如即幫口大讚對方唱得好。