鄭俊弘「蜜」認同女神吳若希拍拖

年僅22歲、擁有43吋長腿的吳若希（Jinny），出道短短數年已緋聞不絕，先後與蕭正楠、籃球員劉子健及「巨聲幫」周志文傳撻着，不過，原來其真命天子另有其人，更是同門師弟兼近日橫掃各大頒獎禮新人獎的鄭俊弘（Fred）！

《好報》圖文並茂影到兩人月初相約拍拖放狗，身為男友的Fred，先與家姐踩場視察環境，由於現場有不少狗友，Fred即以手機遙控女友行到較少人及僻靜的地方「談心」，而醒目家姐為免做電燈膽，亦自動波走到狗友堆吹水，留下細佬與Jinny爭取拍拖時間。

「陪我一輩子」

兩人為免被認出，當日齊齊戴帽，Fred更戴墨鏡遮掩「熊貓眼」。期間情到濃時，Fred主動彎腰情深款款望住Jinny，又講笑話氹到大笑姑婆女友哈哈大笑。由於狗公園下午五時閂門，兩人死纏至最後一秒先肯離開，Fred待女友先行告退後，才與家姐會合上車離去。

微博露玄機

其實「俊希戀」撻着早在微博埋下伏線，由於兩人同是星夢歌手，近月不時孖實出騷，加上Fred早前與秦沛女兒姜麗文分手，故與Jinny朝夕相對下擦出愛火花。近日Jinny不時在微博上載兩人合照，放狗當日又留言向Fred示愛：「喜歡看你笑，喜歡看你跑，喜歡你就算外面多少誘惑，最後你都會很緊張地回來找我，讓我感覺我是屬於你唯一一個，如果可以，我希望你可以陪我一輩子，I Love You。」齋睇都覺得冧爆！

勁讚Fred好仔

記者就事件致電一對小情人，兩人全程哈哈大笑，似乎已有心理準備公開戀情。Fred說：「我同Jinny係好Friend，係一齊放狗，當日我家姐亦都喺度，唔好諗咁多。」Fred臨收線前更突然彈出：「Yeah！開心。」明顯沐浴愛河。而不乏裙下之臣的Jinny則說：「係一班朋友放吓狗。」說罷隨即轉移視線指在微博「示愛」文字是寫給愛犬Honey，問到有否機會與Fred發展？Jinny即激讚對方說：「佢好好人，係好乖嘅男仔。」