等見家長！翠如BB屋企人讚阿蕭好搞笑

藝人黃翠如在九龍灣出席相機活動，她指平日多於出埠時拍照，自言喜歡影人像如老人和小孩，可有影男友蕭正楠，她說：「我哋好少影相，去旅行同平日都係得幾張，呢排宣傳新劇想攞張拍攝時嘅合照都冇，要上網Cap返圖做宣傳。（點解唔影合照？）我哋都唔鍾意影相，嗰時工作都冇刻意影，我都覺得要影多啲，依家要將啲劇照Save低，呢套劇都儲咗幾十張。」

翠如又表示男友專登去買大眼仔鏡頭和靚相機，結果懶影相的二人將它「擺埋」一邊，並謂自己的自拍技術一般般，但笑言阿蕭影相out of focus更差！問到會否做男友影相model，她笑謂：「真係好少，佢鍾意影漫畫人物多過我，佢影《進擊之巨人》個頭都唔影我個頭。」

拍完劇先撻着

提到阿蕭稱正等待獲邀新年見家長，翠如說：「你咩？我問吓父母邀唔邀請佢先，我覺得會邀請嘅，應該要嘅，我都等佢邀請我啦。」並謂雙方未曾「見家長」，但父母最近追看《師奶Madam》，兩老都覺得「未來女婿」好搞笑：「依家播緊頭幾集，當時其實唔熟，睇番覺得我哋幾有默契，幾得意。（拍攝時撻着？）我哋拍完劇先撻着，因為呢套劇冇浪漫情節。（拍完難捨難離？）一半半啦，拍完我出埠先開始send message溝通、講私人嘢，就發現大家都幾好咁。」